«Սմարթ-էկրաններ Աշխարհացույցի դպրոցներին 2026»
«Վիզուալ Հայաստան» զարգացման հիմնադրամը «Աշխարհացույց» կրթական ծրագրի շրջանակում հայտարարում է հանրակրթական դպրոցներին ժամանակակից տեխնիկայով զինելու՝ «Սմարթ-էկրաններ Աշխարհացույցի դպրոցներին 2026» մրցութային ծրագրի մեկնարկը։
Ծրագրի նպատակն է Հայաստանի պետական հանրակրթական դպրոցներին զինել նոր սերնդի կրթական սմարթ-էկրաններով՝ որպես ժամանակակից կրթական միջավայր ձևավորող թվային ենթակառուցվածքի առանցքային բաղադրիչ։ Մրցութային ծրագիրը, «Վիզուալ Հայաստան» զարգացման հիմնադրամի այլ հեղինակային ծրագրերի նման, մշակվել և առաջնահերթություն է ստացել կարիքների գնահատմատման արդյունքում։
Հայաստանի հանրակրթական դպրոցներում ժամանակից կրթական միջավայր ստեղծելուն միտված «Սմարթ-էկրաններ Աշխարհացույցի դպրոցներին 2026» (ՍԷԱԴ 2026) մրցույթ-ծրագիրը հնարավոր է դարձել իրականացնել Հիմնադրամի ռազմավարական գործընկեր «Մանուկյան Սիմոն» հիմնադրամի շարունակական աջակցության շնորհիվ։
***
Ստորև խնդրում ենք ուշադիր կարդալ և ծանոթանալ Ծրագրի բովանդակությանը, պահանջներին և պայմաններին։
Ո՞վ կարող է դիմել
ՍԷԱԴ 2026 մրցույթ-ծրագրին կարող են դիմել «Աշխարհացույց» կրթական համայնքի` շահույթ չհետապնդող այն բոլոր հանրակրթական դպրոցներն ու քոլեջները, որոնք բավարարում են հետևյալ չափանիշներին.
- ունեն «Աշխարհացույց» հարթակի կիրառման առնվազն 6 ամսվա փորձառություն,
- դպրոցի ուսուցիչները մասնակցել կամ մասնակցում են Հիմնադրամի վերապատրաստումներին,
- դպրոցի անձնակազմը քաջատեղյակ է մրցույթ-ծրագրի պայմաններին և պատրաստակամ է դրանք կյանքի կոչել,
- սովորողները գրանցված են brainograph.com հարթակում,
- դպրոցն այս պահին կամ առաջիկա մեկ տարին չի հիմնանորոգվելու,
- դպրոցի տնօրինությունը պատրաստակամ է Հիմնադրամի հետ կնքել համագործակցության պայմանագիր, որով ստանձնում է պատասխանատվություն ծրագրի բոլոր փուլերի լիարժեք իրականացման, ռեսուրսների նպատակային օգտագործման և սահմանված ժամկետներում հաշվետվողականության ապահովման համար,
- դպրոցը կարևորում և խրախուսում է մասնագետների շարունակական մասնակցությունը Հիմնադրամի կողմից իրականացվող վերապատրաստումներին՝ միաժամանակ նպաստելով «Աշխարհացույց» կրթական հարթակի հնարավորությունների ինտեգրմանը դասապրոցեսում՝ որպես սովորողների ներգրավվածության բարձրացման արդյունավետ գործիք,
- Հիմնադրամի վերապատրաստումներից ունեցած հավաստագրերը կդիտարկվեն որպես առավելություն։
Մրցույթի թեման է՝ «Քարտեզագրելով Հայաստանի բնության ապագան․ գլոբալ խնդիրներ, տեղային լուծումներ»։ Մրցույթը կընթանա երկու փուլով։ Նախագծային մրցույթ-ծրագրի ամբողջական հայեցակարգին ծանոթացեք հետևյալ հղումով։ Ստորև ներկայացված են յուրաքանչյուր փուլի համար սահմանված պահանջները։
I փուլ
Առաջին փուլի համար սահմանված են հետևյալ պահանջները.
— բեռնել և լրացնել հետևյալ ձևաթուղթը,
— լիարժեք լրացնել հետևյալ հայտը։
Ուշադրություն․ չեն դիտարկվի այն դիմումները, որոնք չեն բավարարի առաջին փուլի պահանջները։
Դիմելու վերջնաժամկետը ս․թ․ ապրիլի 30-ն է։ Դիմումի ամբողջական փաթեթն անհրաժեշտ է ուղարկել smartschools@visualarmenia.org էլհասցեին՝ «Թեմա» բաժնում գրելով Ծրագրի անվանումը՝ «Սմարթ-էկրաններ Աշխարհացույցի դպրոցներին 2026»:
Երկրորդ փուլ անցած դպրոցներն այդ մասին կտեղեկացվեն ս․թ․ մայիսի 10-ին էլհասցեի միջոցով, որից հետո կմեկնարկի 2-րդ՝ բուն նախագծի իրականացման և վերապատրաստումների փուլը։
II փուլ
Երկրորդ փուլը կմեկնարկի ս.թ. մայիսի 15-ին և կավարտվի հոկտեմբերի 10-ին՝ նախագծային աշխատանքների հանձնմամբ։ Ծրագրի երկրորդ փուլ անցած դպրոցները կներգրավվեն առնվազն 6 թեմատիկ վերապատրաստումներում (նախագծային աշխատանքի հմտություններ, 21-րդ դարի հմտություններ, ՏՀՏ հմտություններ և այլն), որոնց նպատակն է ներգրավված դպրոցներին ուղղորդել և աջակցել լավագույն նախագծային աշխատանք կատարելու ճանապարհին։
«Քարտեզագրելով Հայաստանի բնության ապագան․ գլոբալ խնդիրներ, տեղային լուծումներ» խորագրով իրականացված նախագծային աշխատանքները կդիտարկվեն և կգնահատվեն մրցութային հանձնաժողովի կողմից հետևյալ սանդղակի հիման վրա։ Մասնակիցներից պահանջվելու է նախագծային աշխատանքի վերջնարդյունքը ներկայացնել brainograph.com հարթակում՝ հղումն ուղարկելով Հիմնադրամին։
Լավագույն 80 աշխատանքներ ներկայացրած դպրոցները կվաստակեն նոր սերնդի սմարթ-էկրան: Պարտադիր պայմանները բավարարած և հավասար միավորներ հավաքած դպրոցների ընտրության համար սահմանված հավելյալ չափանիշներն են․
- դպրոցում «Աշխարհացույց» կրթական ծրագրի շահառու սովորողների քանակ,
- դպրոցում «Աշխարհացույց» կրթական ծրագրին ներգրավված ուսուցիչների քանակ,
- դպրոցում նորարարական ուսումնական տեխնիկայի կարիք,
- դպրոցի՝ համայնքում մենթոր լինելու կամ դառնալու հանգամանք։
Ի գիտություն
- Երկրորդ փուլ անցած դպրոցների հետ կիրականացվի մենթորական աշխատանք՝ ըստ Ծրագրի սահմանած ժամանակացույցի և ուղեցույցի։
- Նախագծային աշխատանքների գնահատումը կատարելու է տարբեր կրթական կառույցների ներկայացուցիչներից կազմված հանձնաժողովը։
