Մարզային սեմինարների հինգերորդ հանդիպումը. Կոտայք
Հոկտեմբերի 28-ին «Վիզուալ Հայաստան» զարգացման հիմնադրամը, ԿԶՆԱԿ հիմնադրամի հետ համատեղ, Կոտայքի մարզում իրականացրեց «Աշխարհացույց» կրթական նորարարական հարթակի ճանաչման և գործածման անվճար սեմինար։
Սա արդեն թվով հինգերերոդ հանդիպումն է մարզերի ուսուցիչների հետ։ Նախկինում սեմինարներ են տեղի ունեցել Տավուշում, Գեղարքունիքում, Շիրակում և Լոռիում։ Սեմինարի նպատակն է սովորեցնել ուսուցիչներին ինչպես օգտվել «Աշխարհացույց» հարթակից, ինչպես կիրառել հարթակը դասապրոցեսում և զարգացնել նրանց մեթոդամանկավարժական ու առարկայական հմտությունները։
«Մեր համոզմունքն է, որ կրթության բովանդակությունը պետք է փոխանցվի աշակերտին 21-րդ դարի պահանջներին համապատասխան միջոցներով և մեթոդաբանությամբ։ Մասնավորապես, մերօրյա իրականության պայմաններում կրթությունն ունի որոշիչ դեր․ այն ապագայի հաջողությունների և հաղթանակների երաշխիքն է։ Հենց այս նպատակով մենք ստեղծել ենք «Աշխարհացույց» նորարարական կրթական հարթակը, որը սովորելու և սովորեցնելու ամբողջովին նորարար մոտեցում է», — նշեց «Վիզուալ Հայաստան» զարգացման հիմնադրամի գործադիր տնօրեն, «Աշխարհացույց» հարթակի հեղինակ Հովհաննես Ղազարյանը։
«Այսօր «Աշխարհացույց»-ից օգտվում է ավելի քան 500 ուսուցիչ, որոնք աշխատում են շուրջ 20000 աշակերտի հետ։ Հարթակն ապահովում է պատմություն առարկայի ինտերակտիվ և պատկերավոր դասավանդում, նպաստում է աշակերտների վերլուծական և ստեղծարար մտքի ձևավորմանը, ինչպես նաև առաջադիմության բարձրացմանը», — ասաց «Աշխարհացույց» ծրագրի ղեկավար Արևիկ Ավետիսյանը։
Սեմինարի ընթացքում մասնակից ուսուցիչներն ամրապնդեցին տեսական գիտելիքը գործնական առաջադրաքների միջոցով։ Մարզային սեմինարը ուսուցիչներին ապահովում է ժամանակակից կրթական չափորոշիչներին համահունչ արդյունավետ դասապրոցես կազմակերպելու հմտություններով, ինչպես նաև հմտացնում նորարարական տեխնոլոգիան կիրառելու հարցում։
«Վիզուալ Հայաստան» զարգացման հիմադրամը ԿԶՆԱԿ (Կրթության զարգացման և նորարարությունների ազգային կենտրոն) հիմնադրամի հետ համատեղ 2023թ-ի ապրիլից մեկնարկել է «Աշխարհացույց» կրթական նորարարական հարթակի ճանաչման և գործածման մարզային սեմինարիների շարք։
«Աշխարհացույց»-ը (հասանելի brainorgaph.com հարթակում) նորարար կրթական ծրագիր է, որն իրականացվում է «Մանուկյան Սիմոն» հիմնադրամի աջակցությամբ։ Ծրագիրը հնարավորություն է տալիս դպրոցական առարկաների ուսուցումը դարձնել պատկերավոր, հետաքրքիր և հանրամատչելի։
Սեմինարի մասնակիցները կստանան «Աշխարհացույց» կրթական նորարարական հարթակի ճանաչման և ծրագրի մասնակցության, ինչպես նաև կիրառման հավաստագրեր հետևյալ նախապայմաններն ապահովելու պարագայում․
- Մասնակցել սեմինարին՝ ըստ նախապես կազմված օրակարգի
- Հաջորդ մեկ ամսվա ընթացքում կիրառել հարթակը դասերին, ուղարկել լուսանկարներ և տեսանյութ info@visualarmenia.org էլ․ հասցեին կամ գրել FB աշխարհացույց փակ խմբին https://www.facebook.com/groups/ashkharatsuyts
- Շաբաթական առցանց հանդիպումներին ներկայացնել Աշխարհացույց հարթակի հնարավորությունների կիրառմամբ դասապլան։
