«Աշխարհացույցի մենթորության կրթաթոշակ 2025-2026»
Հայտարարություն
«Վիզուալ Հայաստան» զարգացման հիմնադրամը «Աշխարհացույց» կրթական նորարարական ծրագրի շրջանակներում հայտարարում է «Աշխարհացույցի մենթորության կրթաթոշակ 2025-2026» ծրագրի մեկնարկը։
Ծրագրի նպատակն է՝ ձևավորել «Աշխարհացույց» կրթական հարթակից օգտվելու (կայքը` https://brainograph.com/), հարթակի օգնությամբ ներգրավվող դասեր կազմակերպելու հմտություններ ունեցող, արդի մեթոդամանկավարժական նոր կարողություններ զարգացնող և սեփական փորձը գործընկերներին փոխանցելու կարողություններով օժտված ուսուցչական համայնք:
Ըստ ԿԶՆԱԿ փորձագիտական կարծիքի՝ «Աշխարհացույցի մենթորական կրթաթոշակ» ծրագիրը «համապարփակ ու կարևոր նախաձեռնություն է, որն ուղղված է ուսուցիչների մասնագիտական շարունակական զարգացման որակի բարելավմանը»։ Այն հնարավորություն է տալիս շահառուներին ոչ միայն զարգացնելու իրենց մասնագիտական գիտելիքներն ու հմտությունները, այլև դառնալու համայնքի ներսում դրանց փոխանցողներ և առաջնորդներ։
Ծրագրին կարող են դիմել Հայաստանի Հանրապետությունում պատմություն, հասարակագիտություն, աշխարհագրություն և գրականություն դասավանդող ուսուցիչները (ընտրվելու է 20 ուսուցիչ Երևանից և ՀՀ մարզերից): Դիմելու վերջնաժամկետը ս․թ․ նոյեմբերի 30-ն է։ Դիմելու համար հարկավոր է լրացնել հետևյալ հարցաշարը։
Ուշադրություն։ Նախնական փուլ անցած ուսուցիչները հաջորդիվ կանցնեն հարցազրույցի փուլ, որից հետո կընտրվի 20 ուսուցիչ։
Նախնական փուլը հաղթահարելու համար կարևոր են՝
- դիմում-փաթեթի լիարժեքությունը, կոկիկությունը,
- մոտիվացիոն նամակը,
- «Աշխարհացույցում» ընդգրկվածության մակարդակը՝ հավաստագրեր, դասեր և այլն։
Ծրագրի շահառու դարձած ուսուցիչներն իրենց առաջադիմության հիմքով կստանան կրթաթոշակ, իսկ Ծրագիրը հաջողությամբ ավարտելու դեպքում՝ նաև «Աշխարհացույց» ծրագրի մենթոր-ուսուցչի վկայական։
Ծրագրի տևողությունը՝ վեց ամիս
Մանրամասներին կարող եք ծանոթանալ Ծրագրի հայեցակարգում։
Ծրագրին դիմելու համար անհրաժեշտ փաթեթը․
- լիարժեք լրացված հարցաշար,
- մոտիվացիոն նամակ՝ «Ինչպե՞ս են նոր տեխնոլոգիաները և ժամանակակից մանկավարժական մոտեցումները վերափոխում կրթությունը» խորագրով,
- «Աշխարհացույց» հարթակի միջոցով արված դասերի լուսանկարներ, տեսանյութեր, որոնք պետք է ուղարկել mentorship@visualarmenia.org էլհասցեին՝ «Թեմա» բաժնում գրելով ծրագրի անվանումը՝ «Աշխարհացույցի մենթորության կրթաթոշակ 2025-2026»,
- առկայության դեպքում՝ «Վիզուալ Հայաստան» զարգացման հիմնադրամի ծրագրերից ստացած հավաստագիր/ների պատճեններ,
- առկայության դեպքում՝ վերջին հինգ տարիներին մասնակցած այլ կրթական ծրագրերի հավաստագրերի պատճեններ։
